मुंब्रा-कौसामध्ये सुमारे आठ तास वीजपुरवठा खंडित- टोरंट पॉवरविरोधात नागरिकांचा संताप

मुंब्रा : ठाणे महापालिका हद्दीतील मुंब्रा-कौसा परिसरात रविवारी संध्याकाळी सुमारे साडेसात वाजता खंडित झालेला वीजपुरवठा सोमवारी पहाटे सुमारे सव्वा तीन वाजता पूर्ववत झाला. जवळपास आठ तास वीजपुरवठा बंद राहिल्याने हजारो नागरिकांना प्रचंड मनस्ताप आणि गैरसोयींना सामोरे जावे लागले. या दीर्घकाळाच्या वीजखंडितीमुळे टोरंट पॉवरच्या कारभाराविरोधात नागरिकांनी तीव्र संताप व्यक्त केला असून, कंपनीच्या जबाबदारीबाबत गंभीर प्रश्न उपस्थित केले आहेत.

रविवारी रात्रीच्या वेळेत अचानक वीजपुरवठा खंडित झाल्याने अनेक कुटुंबांना फॅन, एसी बंद पडल्याने उकाड्याचा सामना करावा लागला. लहान मुले, ज्येष्ठ नागरिक, आजारी रुग्ण तसेच महिलांचे मोठ्या प्रमाणात हाल झाले. पाणी टाकीत भरण्यासाठी वीज नसल्याने पाणीपुरवठ्यावरही परिणाम झाला. अनेक ठिकाणी पिण्याच्या पाण्याची टंचाई निर्माण झाली, तर इन्व्हर्टर आणि बॅटरीची क्षमता संपल्याने नागरिकांना अंधारात रात्र काढावी लागली. मोबाईल फोन चार्ज करता न आल्याने संपर्क व्यवस्था विस्कळीत झाली. 

वीजबिल भरण्यास काही दिवसांचा विलंब झाला तरी टोरंट पॉवरकडून विलंब शुल्क आकारले जाते. थकबाकी वाढल्यास वीजपुरवठा खंडित करण्याची कारवाईही तत्काळ केली जाते. मात्र, कंपनीच्या निष्काळजीपणामुळे किंवा तांत्रिक बिघाडामुळे तासन्तास वीजपुरवठा खंडित राहिल्यास त्याची जबाबदारी कोण घेणार, असा सवाल नागरिकांनी उपस्थित केला आहे. ग्राहकांकडून सेवा शुल्क आणि विविध आकारणी नियमित घेतली जाते, परंतु त्याबदल्यात दर्जेदार व अखंडित सेवा मिळत नसल्याची भावना व्यक्त होत आहे.

मुंब्रा आणि कौसा परिसरात वारंवार होणारे वीजखंडितीचे प्रकार, कमी दाबाने होणारा वीजपुरवठा, देखभाल आणि दुरुस्तीतील विलंब याबाबत यापूर्वीही अनेकदा तक्रारी करण्यात आल्या आहेत. स्थानिक लोकप्रतिनिधी, विरोधी पक्ष तसेच सत्ताधारी पक्षातील नेत्यांनीही वेळोवेळी या प्रश्नावर आवाज उठवत सुधारणा करण्याची आश्वासने दिली. मात्र, प्रत्यक्षात परिस्थितीत अपेक्षित बदल झालेला नसल्याची नाराजी नागरिकांनी व्यक्त केली आहे.

याशिवाय, काही दिवसांपूर्वी उघड्या आणि असुरक्षित वीजवाहिन्यांमुळे घडलेल्या दुर्दैवी घटनेत १७ वर्षीय मुलीचा मृत्यू झाल्यानंतरही वीज यंत्रणेच्या सुरक्षिततेबाबत गंभीर प्रश्न उपस्थित झाले होते. या घटनेनंतरही आवश्यक सुधारणा आणि प्रतिबंधात्मक उपाययोजना प्रभावीपणे राबविल्या गेल्या नसल्याचा आरोप स्थानिक नागरिक करत आहेत. निष्काळजीपणा, देखभालीचा अभाव आणि कामातील हलगर्जीपणा यामुळे अशा घटना घडत असल्याची भावना परिसरात व्यक्त होत आहे.

नागरिकांनी टोरंट पॉवरकडून वीजपुरवठा व्यवस्थेचे आधुनिकीकरण, तांत्रिक बिघाडांवर तातडीने नियंत्रण, देखभाल व्यवस्था अधिक सक्षम करणे, आपत्कालीन परिस्थितीत प्रभावी संवाद व्यवस्था निर्माण करणे आणि दीर्घकाळ वीजपुरवठा खंडित झाल्यास ग्राहकांना योग्य नुकसानभरपाई देण्याबाबत स्पष्ट धोरण जाहीर करण्याची मागणी केली आहे.

मुंब्रा-कौसातील वारंवारच्या वीज समस्येमुळे नागरिकांमध्ये असंतोष वाढत असून, अखंडित, सुरक्षित आणि विश्वासार्ह वीजपुरवठा सुनिश्चित करण्यासाठी टोरंट पॉवरने तातडीने ठोस उपाययोजना कराव्यात, अशी जोरदार मागणी नागरिकांकडून करण्यात येत आहे.